عرب دنیا کی پہلی مکمل اردو ویب سائٹ کا اجراء

نئی دہلی 29اکتوبر(یواین آئی)

عرب دنیا میں اردو کی پہلی مکمل ویب سائٹ کا اجراء آج سعودی عرب کے شہر جدہ سے کیا گیا ۔سعودی عرب کے واحد اردو روز نامے ’اردو نیوز‘کی طرف سے شروع کی گئی اس ویب سائٹ میں عالم عرب ‘ہندوستان اور پاکستان کے علاوہ دنیا بھر کی تازہ ترین خبریں ‘سعودی قوانین سے آگاہی،کمیونٹی کے مسائل اور حجاج ومعتمرین کے بارے میں معلومات فراہم کی جائے گی ۔ یہ اطلاع آج یہاں ’اردونیوز‘کے مستقل کالم نگاراور سینئر صحافی معصوم مرادآبادی نے فراہم کی ہے ۔ اس ویب سائٹ میں تازہ ترین خبروں کے علاوہ عمومی دلچسپی کے کئی متنوع موضوعات شامل ہیں جن میں ادب وثقافت ،کھیل کود قابل ذکر ہیں۔واضح رہے کہ سعودی عرب کے سب سے بڑے انگریزی روزنامے ’عرب نیوز‘سے شائع ہونے والا روزنامہ ’اردونیوز‘عالم عرب کا واحد اور مقبول روزنامہ ہے ۔ جس نے ایک طویل عرصے کے بعد اپنی ویب سائٹ کا اجراء کیا ہے۔قارئین www.urdunews.comپرلاگ ان کرکے اس ویب سائٹ سے استفادہ کرسکتے ہیں ۔