کثیر الاشاعت روزنامہ اردو ٹائمز ممبئی کا ۲۷مئی سے دوبارہ آغاز

مدیرروزنامہ اردو ٹائمز سعید حمید
ممبئی ،26،مئی ۔کثیر الاشاعت روزنامہ اردو ٹائمز ممبئی کا ۲۷مئی بروز جمعہ سے نئے رنگ روپ میںآغاز ہورہا ہے۔گذشتہ مہینوںخانگی وجوہات کی بنا پر اخبار کی اشاعت معطل کردی گئی تھی لیکن مذکورہ مسائل حل ہونے کے بعد اب اشاعت کا سلسلہ نئ آب و تاب کے ساتھ شروع کیاجارہا ہے۔ روزنامہ اردو ٹائمز کے مالک سعید احمد کے مطابق’’گذشتہ چھ دہائیوںسے روزنامہ اردو ٹائمز ملت کی ترجمانی کا فریضہ انجام دیتارہا ہے ۔ الحمد للہ ہم نے مسلسل ان مسائل کو ملت کے سامنے پیش کیا ہے جسے نام نہاد نیشنل میڈیا دبانے کی کوشش کرتا رہا ہے۔ان چھ دہائیوںمیں جہاں صحافت کا رنگ و روپ تبدیل ہوا ہے وہیں صحافتی پیمانے بھی بدلے گئے ہیں لیکن ہمیں خوشی ہے کہ ملت کی ترجمانی کا جو فریضہ ہم نے اول روز طے کیا تھا آج بھی ہم اس پر قائم ہیں‘‘۔ انہوں نے کہا کہ ’’یہ ملت کی ترجمانی ہی ہے کہ ہم نےادارت کی ذمہ داری ایک ایسے شخص کو دی ہے جس کے بارے میں یہ مشہور ہے کہ انہوں نے ہمیشہ ملت کی ترجمانی کی ہے ۔سعید حمید نے اپنے قلم کا زور اس وقت دکھایا تھا جب لوگ انڈرورلڈ سےگھبراتے تھے۔آج جبکہ قلم پر پابندیاں عائد کی جارہی ہیں سعید حمید قلم کے ذریعہ آپ کی خدمت کے لیے حاضر ہوئے ہیں۔
انہوں نے کہا کہ ’’ہمیں قارئین سے پہلے بھی محبت ملتی رہی ہے اور امید ہے کہ محبت کا یہ سلسلہ جاری رہے گا کیونکہ ہم صرف آواز ہی نہیں بلکہ دلوں کی دھڑکن بھی ہیں ۔‘‘